Donald Trump, fyrrverandi Bandaríkjaforseti, vann stórsigur í forkosningum Repúblikanaflokksins í Iowa-ríki í nótt en hefð er fyrir því að þar hefst slagurinn um útnefningu flokksins. Barist var um 40 kjörmenn og þegar yfir 90% atkvæða hafa verið talinn er allt útlit fyrir að Trump fái helming þeirra eða 20 talsins.
Það er í samræmi við skoðanakannanir fyrir kosningarnar en er þó engu að síður mikill sigur fyrir Trump.
Helstu tíðindi kosningana voru þó þau að Ron DeSantis, ríkisstjóri Flórída, landaði öðru sæti og átta kjörmönnum og bar því sigur af Nikki Haley, ríkisstjóra Suður-Karólínu sem útlit er fyrir að fái sjö kjörmenn.
Haley hafði sótt mjög á fyrir kosningarnar í skoðanakönnunum og var með 20% fylgi samkvæmt þeim á móti 16% fylgi DeSantis. Á móti kemur sýndu sömu kannanir að kjósendur Haley voru ólíklegastir til að mæta á kjörstað á meðan kjósendur DeSantis voru líklegastir til að mæta. Miklar frosthörkur í Iowa gerðu svo eflaust útslagið fyrir Haley.
Annað sætið í forkosningum gæti reynst því mikilvægt útaf fjölmörgum dómsmálum Trumps sem enn á eftir að útkljá fyrir dómstólum ytra en þau gætu mögulega haft áhrif á kjörgengi hans.
Næst verður kosið í New Hampshire-ríki eftir átta daga.
