Embætti Ríkislögreglustjóra sendi frá sér tilkynningu fyrir stundu. Þar kemur fram að maður sem handtekinn var í morgun á Akureyri hafi verið meðlimur Íslamska ríkisins, ISIS. Hann hafi ásamt fjölskyldu sinni verið fluttur úr landi samdægurs.

Í tilkynningunni kemur fram að þrír karlmenn voru handteknir í lögregluaðgerðum á Akureyri í morgun. Í framhaldi af því voru framkvæmdar húsleitir á tveimur stöðum og lagði lögreglan hald á farsíma og peninga. Tveimur karlmannanna hafi nú verið sleppt. Þriðji maðurinn var fluttur til Grikklands ásamt eiginkonu sinni og sex börnum sem eru á aldrinum 6 mánaða til 16 ára og sé flugvélin sem flutti fjölskylduna lent í Grikklandi. Fjölskyldan kom hingað til lands í september og sótti um alþjóðlega vernd hér á landi en var synjað á þeim forsendum að hún hafi fengið alþjóðlega vernd í Grikklandi.

Í tilkynningunni kemur fram að aðgerðir lögreglu hafa staðið yfir síðan í nóvember í samstarfi við erlend lögregluyfirvöld, þar á meðal Europol, vegna upplýsinga um að fjölskyldufaðirinn sé meðlimur í Íslamska ríkinu, ISIS.

„Mikilvægt þótti að tryggja öryggi og velferð fjölskyldunnar í aðgerðinni í morgun og voru því starfsmenn félagsþjónustu, barnaverndar og heilbrigðismenntað starfsfólk ásamt fjölda lögreglumanna á vettvangi,“ segir ennfremur í tilkynningunni.

Aðgerð lögreglu hafi tekist vel og sé nú lokið en rannsókn málsins sé enn á viðkvæmu stigi og því ekki hægt að veita nánari upplýsingar að svo stöddu.