„Ég rakst á þennan og þar sem ég var með örmerkjaskanna þá ákvað ég að skanna hann og athuga hvar hann ætti heima. Hann var skráður til heimilis þó nokkuð langt í burtu svo ég ákvað að hringja í eigandann. Kom þá í ljós að Svarti Pétur er búinn að vera týndur í tvö ár,“ segir Anna Margrét Áslaugardóttir.

Anna Margrét, sem situr í stjórn hjá Dýrfinna og Kattavinafélagi Íslands, segir í samtali við DV að hún hafi verið að aðstoða vin sinn við að leita að kettinum hans, Sandi, sem týndur hefur verið í miðbænum.

Rakst hún þá á þennan kött og þar sem Anna Margrét er nær alltaf með örmerkjaskannann á sér, ákvað hún að skanna hann.  

„Þetta sýnir okkur að týndir kettir hafa ekkert sérstakt útlit! Hann er vel í holdum og gæfur. Það getur vel verið að hann sé búinn að búa hjá einhverjum part af þessum tíma en það sýnir okkur líka að ef köttur birtist bara hjá þér og ekki dugar að finna eiganda á netinu þá þarf að skanna kisu fyrir örmerki. Látum okkur dýrin varða og gefum þeim tækifæri á að komast heim sérstaklega fyrir veturinn, hægt er að auglýsa eftir sjálfboðaliðum til að skanna kisur,“ segir Anna Margrét í færslu í Facebook-hópnum Íbúar í Norðurmýri. Svarti Pétur fannst í portinu sem bakgarðar húsa við Grettis- og Njálsgötu, Snorrabraut og Barónsstíg mynda. 

Anna Margrét segir í samtali við DV að á dyrfinna.is sé bæði hægt að kaupa örmerkjaskanna ef fólk vill eiga slíkan skanna og þar er jafnframt listi af fólki sem hægt er að hafa samband við. „Einnig er hægt að setja póst inn á hverfishópinn sinn með ósk um hjálp með að skanna. Það eru margir sem eiga skanna en vilja ekki vera á lista.

Svo er eitt með skönnun, þó að dýrið sé skráð nálægt þar sem það er þá er rosalega gott að meta aðstæður til dæmis hegðun dýrsins. Ef það virðist hrætt eða að biðja um hjálp að heyra þá í eiganda annað hvort með því að hringja eða senda SMS, það hefur alveg gerts að kisi finnist nálægt heimili þó hann sé búinn að vera týndur lengi,“ segir Anna Margrét.

„Svarti Pétur fannst því ég var að hjálpa vini mínum að leita að kisunni hans, honum Sandi. Vinur minn tók saman þessar kisur sem eru týndar á sama stað.“

Hafþór birti færsluna í Facebookhópnum Íbúar i Norðurmýri (og víðar), sjá má skjáskot af henni hér fyrir neðan. Sá köttur sem lengst hefur verið leitað að hefur verið týndur í eitt ár, en til allra kattanna hefur sést í miðborginni núna í ágúst.