Næstu átta vikur eru afgerandi fyrir hvernig stríðið í Úkraínu endar. Ástæðan er að í sjónmáli er óstöðugleiki í skipan heimsmála vegna forsetakosninganna í Bandaríkjunum á næsta ári. Niðurstaða þeirra gæti breytt stuðningnum við Úkraínu og af þeim sökum skiptir miklu máli hvaða árangri Úkraínumenn ná á vígvellinum á næstu átta vikum.

Þetta sagði Claus Mathiesen, lektor við danska varnarmálaskólann, í fréttaþættinum „Lippert“ á TV2 News.

Hann sagði að Úkraínumenn hafi að hámarki átta vikur til viðbótar til að ná því sem hann kallar „mikilvægum“ árangri í sókn sinni aftur fyrir varnarlínur Rússa.

Þegar kemur fram í byrjun desember munu veður og ófærð takmarka möguleikana á sóknaraðgerðum og þegar það fer að vora á næsta ári er stutt í forsetakosningarnar í Bandaríkjunum en Bandaríkin eru það ríki sem hefur lagt mest af mörkum til Úkraínu í baráttunni gegn rússneska innrásarhernum.

„Enginn getur sagt með vissu hvern niðurstaða bandarísku kosninganna verður. En samt sem áður er hætta á að stuðningurinn við Úkraínu, sem Bandaríkin eru í fararbroddi fyrir, verði valtur í sessi. Það er aðallega það sem Rússar sitja og bíða eftir,“ sagði Mathiesen.

Hann sagðist ekki sjá þess nein merki að Úkraínumenn séu að ná „mikilvægum“ árangri á vígvellinum.