Ríkissaksóknari hefur gefið út áfrýjunarstefnu í máli hjúkrunarfræðings sem nýlega var sýknuð í Héraðsdómi af ákæru um manndráp. Frá þessu greinir RÚV. Var hjúkrunarfræðingnum gert að sök að hafa af ásetningi banað sjúkling geðdeildar Landspítalans með því að þvinga ofan í hann tveimur næringardrykkjum, en sjúklingurinn lést í kjölfarið og var dánarorsök köfnun þar sem drykkirnir höfnuðu í öndunarfærum.

Hjúkrunarfræðingurinn hefur neitað sök í málinu og vísað til þess að staðið hafi í sjúklingnum og hún hafi verið að beita tiltekinni aðferð til að bjarga lífi hans. Ástandið á geðdeildinni hafi verið erfitt, hún sjálf hafi verið að vinna 19 vaktir á 16 dögum, það var mannekla og mikil þreyta.

Dómari í héraði taldi ljóst að ekki hefði hjúkrunarfræðingurinn nálgast umræddan sjúkling að nærgætni þennan örlagaríka dag. Sú aðferð sem hún hafi vísað til að hafa beitt sé vissulega þekkt, þó svo ekki sé um að ræða hefðbundin viðbrögð við köfnum vegna aðskotahlutar. Hjúkrunarfræðingurinn hafi þó ekki beitt þessari aðferð rétt, en í henni felist að hella drykk rólega ofan í sjúkling en ekki af þeim ofsa sem var beitt þennan tiltekna dag.

Tók dómari sérstaklega fram í niðurstöðu sinni að málið hafi ekki verið flutt fyrir héraðsdómi með slíkum hætti að manndráp af gáleysi kæmi til greina og þar sem ekki var talið sannað að hjúkrunarfræðingurinn hefði haft ásetning til að svipta sjúklinginn lífi, heldur þvert á móti benti flest til þess að hún hafi verið að reyna að bjarga honum, þá bæri að sýkna hana af ákærunni.

Sú ákvörðun ríkissaksóknara að ákæra yfir höfuð í málinu hefur verið nokkuð umdeild. Hafa heilbrigðisstarfsmenn gagnrýnt að þarna sé hjólað í manneskjuna, eða hjúkrunarfræðinginn, þegar raunveruleg orsök harmleiksins hafi verið staðan í heilbrigðiskerfinu og starfsaðstæður á Landspítalanum. Eins hefur verið bent á að ákæra á við þessa geti leitt til þess að fólk sæki síður í störf innan heilbrigðisgeirans sem sé ekki á ástandið bætandi þegar flótti úr þeim stéttum, eða flótti af þeim vettvangi á Íslandi, hefur þegar verið mikill.