Guðfinna Jóhanna Guðmundsdóttir, lögmaður, var í viðtali í Bítinu á Bylgjunni í morgun. Guðfinna hefur sérhæft sig í fasteignamálum einkum þeim sem varða galla í nýbyggingum.
DV fjallaði fyrst fjölmiðla ítarlega um galla í nýbyggingum á Hvítasunnudag og vankanta á eftirliti með þeim málum og ræddi þá við Guðfinnu:
Í viðtalinu í Bítinu ítrekar hún orð sín frá því í viðtalinu við DV að eftirliti með nýbyggingum væri ábótavant. Því miður væri of mikið um að byggingastjórar sinntu ekki nægilega vel því eftirliti sem þeim er falið.
„Kaupandinn ber alltaf sönnunarbyrði fyrir því að eign sé gölluð,“ sagði Guðfinna.
Hún segir að kaupendur gallaðra eigna hafi tvo valkosti. Þeir geti þurft að sitja uppi með gallaða eign þar sem málið sé fyrnt eða farið í mál en oft sé lítið að sækja til seljenda og starfsábyrgðartrygging byggingarstjóra dekki oft ekki kostnaðinn við gallana.
Í slíkum dómsmálum segir Guðfinna að oft þurfi að fá dómkvaddan matsmann með tilheyrandi kostnaði sem hlaupi oft á milljónum.
Í viðtalinu við Bítið minnti Guðfinna á að samkvæmt lögum hafi kaupandi fasteignar rétt á að halda eftir lokagreiðslu að upphæð sem nemur kostnaði vegna galla. Í mörgum tilfellum neiti seljendur hins vegar að samþykkja endurfjármögnun sé lokagreiðslan ekki innt af hendi.
Hún segir misjafnt sé hversu fljótt gallar komi í ljós.
Guðfinna segir við Bítið að kerfið í kringum nýbyggingar og eftirlit með þeim sé ekki að virka. Hún tekur þó fram að misjafnt sé eftir því hvaða aðila er um að ræða hversu vel sé staðið að eftirliti með nýbyggingum.
Að hennar mati eru helstu leiðir til úrbóta að hækka starfsábyrgðartryggingu byggingastjóra og auka heimildir kaupenda til að halda lokagreiðslu eftir. Hún telur einnig ráðlegt að auka heimildir hins opinbera gagvart aðilum sem vitað sé að standi fyrir byggingu húsa með göllum.
