Lýst hefur verið yfir neyðarstigi Almannavarna vegna þriggja snjóflóða á Neskaupstað nú í morgun. Eitt snjóflóð féll á hús í byggð við Starmýri í bænum en hin tvö lentu ekki á byggð. Annað þeirra þveraði Strandgötu, sem liggur út úr bænum, og í sjó fram.
Búið er að rýma allar íbúðir í húsum sem flóðið féll á en blessunarlega virðist sem svo að fólk hafi sloppið við alvarleg meiðsli. Einhverjir eru þó sárir vegna glerbrota í kjölfar þess að gluggar sprungu í húsinu við Starmýri.
Verið er að rýma hús í Neskaupstað og auk þess sem umfangsmikil rýming húsi stendur yfir á Seyðisfirði vegna frekari hættu á flóðum. Fjöldahjálparstöð hefur verið opnuð í Egilsbúð í Neskaupstað, þar sem tekið er á móti fólki sem þarf að yfirgefa hús sín. Tæplega fjörtíu einstaklingar hafa leitað þangað þegar þessi orð eru skrifuð. Þá hefur skólahald verið fellt niður í fjórðungnum og starfsemi fjölda fyrirtækja og stofnanna raskast.
Afar snjóþungt er á svæðinu sem gerir viðbragðsaðilum erfitt fyrir. Flestar götur í Neskaupstað eru ófærar en Vegagerðin reynir að ryðja götur fyrir björgunaraðila að athafna sig.
Þeir íbúar sem þurfa ekki að rýma hús sín, að svo stöddu, eru hvattir til að halda kyrru fyrir heima hjá sér, hlémegin í húsum og bíða frekari upplýsinga. Íbúar annars staðar á Austurlandi hafa einnig verið beðnir að halda sig heima við.
Fyrir þá sem þurfa að rýma húsin sín þá birti Lögreglan á Austurlandi eftirfarandi gátlista yfir það sem gera þarf áður en heimilið er yfirgefið.
