Þann 18. apríl næstkomandi verður aðalmeðferð fyrir Héraðsdómi Norðurlands eystra á Akureyri í máli gegn manni sem ákærður er fyrir kynferðisbrot og barnaverndarlagabrot gegn stúlkubarni.

Í ákæru héraðssaksóknara, sem DV hefur undir höndum, er ekki gefinn upp aldur brotaþolans en ljóst er af samhengi að hún var ekki eldri en 13 ára þegar brot hófust árið 2019. Ekkert er vitað um aldur hins ákærða.

Meint brot voru framin árin 2019, 2020 og 2021. Ekki er um að ræða nauðgun heldur kynferðislega áreitni í gegnum samfélagsmiðilinn Snapchat, sem og í bíl mannsins.

Ákæruliðirnir eru fjórir. Í fyrsta lagi er maðurinn sakaður um að hafa sent stúlkunni mynd af getnaðarlim sínum, „en með háttsemi sinni særði hann blygðunarsemi hennar og sýndi henni vanvirðandi, ósiðlegt og lostugt athæfi,“ segir í ákæru. Þetta mun hafa gerst árið 2019.

Maðurinn er enn fremur sakaður um að hafa á árunum 2019 og 2020 í gegnum Snapchat „aflað sér kynferðislegs myndefnis af barni, en ákærði fékk A til að senda sér kynferðislegar ljósmyndir af henni sjálfri, áður en hún náði 15 ára aldri.“

Í þriðja lagi er hann sakaður um að hafa viðhaft klúrt, lostugt og óviðeigandi orðbragð við stúlkuna í gegnum Snapchat á árunum 2019-2021.

Í fjórða og síðasta lagi er maðurinn sakaður umað hafa að næturlagi í júlí árið 2020, í bíl  sínum, á fáförnum vegi, beðið stúlkuna um að kyssa sig. Segir héraðssaksóknari að í þeirri háttsemi hafi falist kynferðisleg áreitni sem hafi verið til þess fallin að valda stúlkunni ótta.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Farið er fram á miskabætur fyrir hönd stúlkunnar upp á 1,8 milljónir króna.