Vesturlönd hafa algjörlega lagt Rússland á ís í kjölfar innrásarinnar í Úkraínu. Rússar verða því að bjarga sér með því sem þeir eiga því harðar refsiaðgerðir og viðskiptaþvinganir eru í gildi gagnvart þeim.

En eftir því sem Politico segir þá hafa kínversk fyrirtæki, þar á meðal fyrirtæki sem hafa bein tengsl við kommúnistastjórnina, sent vopn til Rússlands og rússneskra fyrirtækja. Þetta er byggt á yfirferð gagna frá tollyfirvöldum.

Meðal annars er um 1.000 vélbyssur að ræða, íhluti í dróna og verndarbúnað. Þetta var sent til Rússlands frá því í júní á síðasta ári og fram í desember.

En sendingarnar voru ekki, að minnsta kosti ekki opinberlega, sem vopn til notkunar í stríði.

CQ-A rifflar voru sendir sem „veiðirifflar fyrir almenning“ þrátt fyrir að þeir séu ekkert annað en eftirlíking af M16 vélbyssum sem Bandaríkjamenn hafa notað í mörgum stríðum.

CQ-A byssur hafa einnig að sögn verið notaðar af kínversku herlögreglunni og herjum sumra ríkja.

Politico leggur áherslu að ekki sé að sjá að kínversk yfirvöld selji mikið magn vopna til Rússlands til að hjálpa Rússum við stríðsreksturinn. En þetta er í fyrsta sinn sem staðfest er að Kínverja sendi vopn til Rússlands, vopn sem er hægt að nota í stríði.