Eftir tæplega 13 mánaða stríð í Úkraínu hefur Vladímír Pútín, Rússlandsforseti, ekki enn náð markmiðum sínum með innrásinni. Rússneski herinn hefur orðið fyrir gríðarlegu tjóni, bæði manntjóni og tjóni á hergögnum. Nú er Pútín sagður vinna leynilega að nýrri herkvaðningu og að nú verði allt að 400.000 menn kallaðir til herþjónustu.

Allt er þetta sagt fara fram á bak við vandlega luktar dyr og lítið sleppur út um ráðabruggið. Dagbladet skýrir frá þessu meðal annarra miðla.

Margar vestrænar leyniþjónustustofnanir hafa spáð því að Pútín muni grípa til nýrrar herkvaðningar á fyrstu mánuðum ársins.

Þrátt fyrir að margt bendi til að ný herkvaðning sé í kortunum, þá hafa ráðmenn í Kreml verið mjög þöglir um þetta.

Þegar Pútín tilkynnti um herkvaðningu 300.000 manna í september leiddi það til fjöldaflótta úr landi, talið er að 700.000 til 1.000.000 karla hafi flúið land, og ringulreiðar innan hersins.

Sérfræðingar telja hugsanlegt að Pútín og félagar hafi gripið til ákveðinna aðgerða að þessu sinni til að koma í veg fyrir að óánægja brjótist út meðal landsmanna. En þeir segja að ný herkvaðning sýni þá örvæntingu sem ríkir meðal ráðamanna.

„Ný herkvaðning er vísbending um að Pútín sé að verða örvæntingarfullur. Þetta er kapphlaup við tímann og Rússland situr fast,“ sagði Kristian Åtland, sérfræðingur við Norska varnarmálaskólann, í samtali við Dagbladet.

Að undanförnu hafa myndir og ljósmyndir, sem eiga að sýna innkallanir frá herkvaðningarskrifstofum, birst á samfélagsmiðlum. En Kremlverjar hafa ekki sagt neitt opinberlega um herkvaðningu.