Lettar eru byrjaðir að senda bíla, sem eru gerðir upptækir í tengslum við ölvunarakstur, til Úkraínu. Þar geta herinn og heilbrigðiskerfið notað þessa bíla í tengslum við stríðið gegn Rússlandi.

BBC skýrir frá þessu og segir að á síðasta ári hafi lög um ölvunarakstur verið hert í Lettlandi og það hafi haft í för með sér að bílar margra ökumanna hafi verið gerðir upptækir.

Í kjölfar lagabreytingarinnar fylltust geymslur lögreglunnar fljótt af bílum sem hald var lagt á. Til að létta aðeins á þessum geymslu er nú byrjað að láta hjálparsamtökunum Twitter Convoy 24 bíla í té í viku hverri og eru þeir fluttir til Úkraínu.

Reinis Poznaks, stofnandi samtakanna, sagði að enginn hafi átt von á að svona mikið yrði um ölvunarakstur og nái yfirvöld ekki að selja bílana jafn hratt og fólk drekki. Það hafi verið kveikjan að hugmynd hans um að senda bílana til Úkraínu.