Frönskum ökuníðingi hefur verið birt fyrirkall og ákæra í Lögbirtingablaðinu vegna náttúruspjalla sem hann framdi, samkvæmt ákærunni, í Skútustaðahreppi í Þingeyjarsveit, sumarið 2021. Keyrði maðurinn utanvega eftir ósnortnu landi og virti ekki vegalokanir.

Maðurinn er sagður hafa með framferði sínu hafa brotið gegn lögum um náttúruvernd og framið umferðalagabrot með því að hafa ekið bíl sínum „utan vega og um ósnortið land á vegi F910, austan við Dreka í Skútustaðahreppi, þar sem hann ók um 30 metra um ósnortið land og olli með atferli sínu spjöllum á náttúrunni meðfram veginum svo á sá, við akstur um svæðið fór ákærði gegn lokunarmerkingum þar sem framangreindum hálendisvegi, F910, hafði verið lokað af Vegagerðinni með merktum skiltum og keðjum,“ eins og segir í ákæru.

Maðurinn er fæddur árið 1969. Krefst lögreglustjóri þess að hann verði dæmdur til refsingar og greiðslu alls sakarkostnaðar.

Málið verður tekið fyrir í Héraðsdómi Norðurlands eystra þann 9. mars næstkomandi. „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður á málið að honum fjarstöddum,“ segir í fyrirkalli frá Héraðsdómi Norðurlands eystra, sem birt er í Lögbirtingablaðinu.