Sonur fiðluleikarans Sean Aloysius Marius Bradley, Moses, hefur höfðað mál við Héraðsdómi Suðurlands og fer fram á að úrskurðað verði með dómi að faðir hans skuli talinn látinn. Þetta kemur fram í tilkynningu í Lögbirtingablaðinu í dag.
Sean, sem er 66 ára gamall og fyrrum fiðluleikari við Sinfóníuhljómsveit Íslands, var búsettur á Selfossi en hann hvarf sporlaust í júní árið 2018 og hefur ekkert til hans spurst síðan. Í Lögbirtingblaðinu kemur fram að Moses hafi leitað til lögreglunnar þann 9. desember 2019 og viðrað áhyggjur sínar af föður sínum. Kemur fram að feðgarnir hafi ekki verið í miklu sambandi en Sean hafi átt við áfengisvandamál að stríða og hefði átt það til að láta ekki ná í sig.
Þá kemur fram í tilkynningunni að um það leyti sem Sean hvarf hafi hann átt bókað flugsæti til Spánar en ekki hafi fengist staðfest hvort að hann hafi nýtt flugsætið né hafi yfirvöld á Spáni getað staðfest hvort hann hafi komið til landsins eða dveldi þar. Engin virkni hafi verið á greiðslukortum Seans né bankareikningum.
Fréttablaðið fjallaði um hvarf Seans þann 1.maí 2020. Í umfjöllun blaðsins kom fram að hvarfið væri dularfullt en samkvæmt heimildum blaðsins hefði Sean mælt sér mót við vinkonu sína skömmu áður en hvarf. Ætluðu þau að keyra saman til Reykjavíkur og fara í kirkju. Hann hafi hins vegar ekki mætt á fund þeirra og þrátt fyrir ítrekuð símtöl hafi ekki náðst í hann. Þá kom áðurnefndur sonur hans, Moses, til landsins um það leyti að freista þess að hitta föður sinn en greip í tómt.
Það dularfyllsta í málinu voru hins vegar skilaboð frá Sean á samfélagsmiðlum um að hann væri kominn til Spánar og væri genginn í búdda-klaustur til að stunda íhugun og vildi vera látinn í friði. Hvort að Sean hafi sent þau skilaboð sjálfur eða einhver með aðgang að samfélagsmiðlum hans er á huldu.
„Það fannst okkur öllum mjög skrýtið því hann var ekki fyrir að fljúga,“ hafði Fréttablaðið eftir nafnlausri vinkonu Seans. Kemur fram að Sean hafi þjáðst af gigt og verið með skerta hreyfigetu. Hann hafi ekki getað hreyft sig langt án stuðnings.
Þá kom fram í umfjöllun blaðsins að lögreglan hafi árið 2020 rætt við aðra íslenska vinkonu Seans, sem hafi ætlað með honum til Spánar. Sú lá þó ekki undir grun um að hafa komið að hvarfi Seans. Þá hafi Lögreglan á Suðurlandi og tæknideild lögreglunnar gert ítarlega leit á heimili Seans á Selfossi en engin ummerki hefðu fundist um að eitthvað saknæmt hefði átt sér stað.
Sagði Oddur Árnason, yfirlögregluþjónn á Suðurlandi, í samtali við Fréttablaðið að ýmsar kenningar væru opnar um hvarf Sean en að það gerði lögreglunni erfitt um vik að tilkynning um hvarf hans hafi borist einu og hálfu ári eftir að hann raunverulega hvarf.
Hver afdrif fiðluleikarans urðu er því á huldu og ekki útlit fyrir að gátan verði leyst í bráð.
