Virginia Giuffre, eitt af fórnarlömbum kynferðisbrotamannsins Jeffrey Epstein, er afar sátt við þann úrskurð dómara í New York í Bandaríkjunum að svipta skuli hulunni af 170 einstaklingum,  sem voru samstarfsmenn og grunaðir vitorðsmenn, níðingsins alræmda. Hingað til hafa einstaklingarnir, sem margir hverjir eru heimsfrægir, verið undir nafnleynd í þeim dómsmálum sem tengjast afbrotum Epstein.

„Það verða mjög margir stressaðir yfir jólin og áramótin,“ segir Guiffre í færslu á X-síðu sinni og þakkar dómara málsins, Loretta Preska, kærlega fyrir.

Finally we are hearing members of the US government senators about the need for transparency and a call to arms for accountability!! There’s going to be a lot of nervous ppl over Christmas and New Years, 170 to be exact, who’s on the naughty list? This would t be possible without… https://t.co/xVfFfQ0UMH

— Virginia Giuffre (@VRSVirginia) December 20, 2023

Þeir sem verða sviptir nafnleyndinni hafa tvær vikur til þess að áfrýja úrskurðinum en annars verður listinn opinberaður snemma á nýju ári. Í úrskurði Preska kemur fram að mörg nafnanna á listanum hafi þegar komið fram. Þar á meðal má nefna nöfn Bill Clinton, fyrrum Bandaríkjaforseta, Bill Gates, stofnanda Microsoft og Andrew Prins.

Virginia kærði Andrew prins fyrir að hafa beitt sig kynferðisofbeldi þegar hún var 17 ára gömul en hún var þá að eigin sögn einskonar kynlífsþræll Epstein og kærustu hans Ghislaine Maxwell. Kæran var lögð fram í ágúst 2021 en sex mánuðum síðar náðist samkomulag utan dómstóla og var málið fellt niður í kjölfarið. Er talið að prinsinn hafi greitt 12 milljónir bandaríkjadollara, um 1,6 milljarð íslenskra króna, til þess að forðast að málið yrði dómtekið.

Eins og frægt varð svipti Epstein sig lífi í ágúst 2019 og Maxwell var dæmd í 20 ára fangelsi árið 2021 fyrir að hjálpa Epstein við að fremja myrkraverk sín gagnvart ungum stúlkum.