Allar leiðir til Grindavíkur verða lokaðar næstu daga nema hvað viðbragðsaðilum og verktökum, sem eiga erindi inn á hættusvæðið við Grindavík, verður heimiluð för til bæjarins.

Þetta kemur fram í Facebookfærslu lögreglunnar á Suðurnesjum í nótt. Biðlar lögreglan til almennings að vera ekki að fara að gosinu og að hafa í huga að gas, sem leggur frá gosstöðvunum, getur verið hættulegt.

Segir lögreglan að vísindamenn þurfi nokkra daga til að meta ástandið á gosstöðvunum og sé staðan í raun endurmetin á hverri klukkustund.

Vegfarendur eru beðnir um að virða lokanir lögreglunnar og sýna þeim skilning.