Tugi samnemenda Nigel Farage, leiðtoga öfgahægriflokksins Reform Party, hafa stigið fram og lýst ógeðfelldu kynþáttahatri sem hann hafi viðhaft alla skólagönguna. Meðal annars gagnvart asískum nemendum og gyðingum.

Nigel Farage sótti skólann Dulwich College á áttunda og níunda áratug síðustu aldar. Eins og greint er frá í breska blaðinu The Guardian hafa 34 samnemendur hans nú stigið fram og lýst hroðalegu kynþáttahatri sem Farage og klíka í kringum hans sýndu af sér alla skólagönguna.

„Hitler hafði rétt fyrir sér!“ og „Gösum þá“ voru frasar sem Farage sagði stundum að sögn leikstjórans Peter Ettedgui sem er gyðingur. Hafi Farage stundum látið frá sér gashljóð þegar hann sagði þetta, með vísun í gasklefa þriðja ríkisins þar sem milljónir voru myrtar.

Adrian Woods, þýðandi, sagðist oft hafa verið vitni að því þegar Farage áreitti Ettedgui. „Þetta gerðist nokkrum sinnum. Hann hafði nokkra aðra í sigtinu sem hann áreitti á sama hátt, suma verr en aðra,“ sagði Woods.

Jason Meredith, verkefnastjóri af indverskum ættum, sagði Farage hafa beitt asíska samnemendur miklu kynþáttahatri.

„Hann notaði mikið orðið „paki“, Farage og fylgdarlið hans,“ sagði Meredith. „Orðið „paki“ og „farið aftur heim,“ var oft notað.“