Breskum manni að nafni Phil Smith brá heldur betur í brún þegar hann fann lort í heimsendingu sinni frá matvöruversluninni Iceland í nóvember síðastliðnum. Ýmislegt átti þó eftir að koma í ljós.
„Allur þessi kúkur datt út úr pokanum og ég fékk áfall. Ég velti fyrir mér hvað í ósköpunum þetta væri? Ég kíkti í annan poka og sá niðurgang. Ég er mjög klígjugjarn og fannst þetta hræðilegt og viðbjóðslegt,“ sagði Smith, sem er 59 ára gamall og býr í borginni Blackburn í norðvesturhluta Bretlands.
Blöðin Metro og Telegraph greina frá þessu.
Smith hafði verið á ferðalagi í um mánuð og ákvað að panta nokkuð stóra pöntun þegar hann kom heim. Það er um 150 punda virði eða rúmlega 26 þúsund króna.
Pokarnir með vörunum voru skildir eftir á ganginum við íbúðina í blokkinni hans. En þegar hann fór með þá inn í eldhús blasti óhroðinn við honum.
„Þetta er viðbjóðslegt. Ég hef engin önnur orð til að lýsa þessu. Ef ég vill vera útataður í skít þá fer ég og skrái mig í þáttinn I´m a Celebrity [raunveruleikasjónvarpsþáttur á ITV]“ sagði Smith.
Smith hringdi samstundis í verslunina og bað þá um að koma að taka pokana. Hann bað ekki um neinar bætur fyrir þetta heldur aðeins viðurkenningu á því hvað hefði gerst.
Pokarnir voru fjarlægðir í kjölfarið og helgina eftir var Smith boðin endurgreiðsla fyrir vörurnar.
„Ég vildi bara endurgreiðslu en ekki neinar bætur. Ef þeir bjóða mér einhverjar bætur þá gef ég dýrahjálp þær,“ sagði Smith.
Smith hafði einnig samband við sveitarstjórnina og heilbrigðiseftirlitið og benti þeim á að gera úttekt hjá verslun Iceland í Hyndburn, þaðan sem hann pantaði téðar vörur.
Iceland gerði sína eigin rannsókn á innihaldi pokans og segja að kúkurinn sé í raun og veru alls ekki kúkur.
„Kvörtun viðskiptavinarins var ítarlega könnuð af starfsfólki Iceland og umhverfisheilbrigðisdeildar sveitarstjórnarinnar. Sveitarstjórn hefur staðfest að efnið sem viðskiptavinur okkar kvartaði yfir var einfaldlega pappi sem hafði breyst í gums þegar hann blotnaði og svo þornað,“ segir í yfirlýsingu.
Hafi heilnæmi matvælanna ekki verið ógnað á neinn hátt vegna þessa.
„Iceland hefur þegar beðið herra Smith afsökunar á að hafa valdið honum uppnámi vegna þessa misskilnings og endurgreitt honum fyrir vörurnar,“ segir enn fremur.
