Þann 6. desember verða réttarhöld við Héraðsdóm Norðurlands eystra yfir manni sem ákærður hefur verið fyrir húsbrot, nauðgun og hótanir gagnvart fyrrverandi unnustu sinni.
Maðurinn er sakaður um að hafa ruðst heimildarlaust inn á heimili konunnar á nýársdag 2022 og nauðgað henni.
Ellefu dögum síðar, þann 12. janúar 2022, er maðurinn sakaður um að hafa farið heimildarlaust inn á heimili konunnar á Akureyri og ekki farið þaðan þrátt fyrir að hún ítrekað bæði hann að fara, og í sama skipti tekið í hár hennar, gripið um hendur hennar og snúið upp á þær, í tvígang slegið hana í rassinn og hótað henni með því að segja:
„Þegiðu og hlustaðu. Þú ert fífl. Ég slæ þig fokking fast utan undir ef þú fokking heldur ekki kjafti. Er þetta þakklætið fyrir að, horfðu á mig, horfðu á mig. Er þetta þakklætið fyrir það að ég sit fyrir framan dómstóla og játa milljón króna bótakröfu. Á ég ekki bara að kýla þig einu sinni og þá erum við kvitt, ha?“
Maðurinn er síðan sakaður um að hafa daginn eftir, þann 13. janúar 2022, farið í óleyfi inn til konunnar og neitað að yfirgefa heimilið þrátt fyrir ítrekaðar beiðnir hennar um það. Hann er síðan sagður hafa slegið hana utan undir.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd konunnar er gerð krafa um miskabætur upp á þrjár milljónir króna.
Búast má við að dómur falli í málinu rétt fyrir áramót.
