Morgunblaðið skýrir frá þessu og hefur eftir Páli að staðan sé flókin en hugsanlega verði á næstu dögum hægt að leggja mat á hvort kvikan í ganginum undir Grindavík hafi storknað. Gangurinn sé ekki mjög þykkur og þunnir gangar storkni fljótt. „Það sem eykur hins vegar á tvíræðnina er að aftur er bullandi landris í Svartsengi. Þar gæti nýr gangur hreinlega verið í bígerð. Málið er því býsna flókið og margar hliðar á því. Fyrir vikið þarf að halda öllum möguleikum á lofti til að ekkert geti komið mönnum á óvart,“ er haft eftir Páli.
Í dag eru tvær vikur síðan náttúruhamfarirnar riðu yfir Grindavík. Mjög hefur dregið úr skjálftavirkni síðan og telja vísindamenn nú litlar líkur á að gossprunga opnist óvænt í Grindavík. Hvað varðar þessa minni skjálftavirkni nefndi Páll tvo möguleika sem geti valdið þeirri þróun: „Annað er að það hafi komið leki að kerfinu, ef þannig má að orði komast. Kerfið þoli ekki þrýstinginn og gos sé að nálgast. Hitt er að kvikugangurinn hafi storknað. Erfitt er að segja til um hvort veldur þessu enda eru einungis 13 dagar frá því að þetta hófst. Til að byrja með gerðust hlutirnir mjög hratt en eftir það hefur hægt á þessu. Smám saman hefur dregið úr þessu og eins og málið stendur núna virðist sem storknunin sé ríkjandi. Það getur hins vegar breyst snögglega og rétt að hafa allan varann á.“
