Borgarráð tók ákvörðun á fundi sínum í dag að minnismerki um séra Friðrik Friðriksson á horni Lækjargötu og Amtmannsstígs verði tekið niður og því því fundinn staður í listaverkageymslum Listasafns Reykjavíkur. 

Sjá einnig: Séra Friðrik tekinn niður og settur í geymslu – „Fá samfélög reisa sér minnisvarða um eigin skömm“

Guðjón Friðriksson, sagnfræðingur og rithöfundur leggur til að stytta eftir Ásmund Sveinsson komi í staðinn, Járnsmiðurinn, sem nú er í litlum garði við Snorrabraut neðan Þorfinnsgötu.

„Þar sem fáir taka eftir henni eða njóta hennar. Þegar Iðnskólinn í Reykjavík varð 50 ára árið 1954 gáfu nokkrir einstaklingar skólanum þessa styttu í tilefni af afmælinu. Meðal þeirra voru Sveinn Guðmundsson í Héðni, Ragnar í Smára, Tómas Guðmundsson skáld, Axel Kristjánsson í Rafha, Skarphéðinn Jóhannsson arkitekt og Kristín Andrésdóttir í Verkakvennafélaginu Framsókn. Styttan var svo tákn iðnsýningarinnar sama ár. Af einhverjum ástæðum fékk hún ekki að vera við hinn nýbyggða iðnskóla í Skólavörðuholti áfram,“ segir Guðjón í færslu á Facebook.

Segir hann að vel færi á á að hafa Járnsmiðinn í Lækjargötu. „Þar var gamli iðnskólinn (húsið stendur enn) og þess má geta að einn af þekktustu járnsmiðum bæjarins, Þorsteinn Tómasson var með járnsmiðju sína í Lækjargötu 10.“

Nokkrir taka vel í hugmynd Guðjóns.

„Við íbúar á Leifsgötunni mótmælum að Járnsmiðurinn verði tekinn af okkur. Þegar þessi skortur er á iðnaðarmönnum þá viljum við halda fast í hvern þann sem við höfum innan seilingar. Nema kannski að við fáum Leif í staðinn?“segir einn nágranni Járnsmiðsins. „Ég heyrði unglingsstúlku segja að hún vildi sjá styttu af Vigdísi Finnbogadóttur í stað sr. Friðriks á þessum stað. Það finnst mér góð hugmynd,“ segir kona nokkur.