Jóhann Scott Sveinsson, þrítugur Íslendingur, hefur verið ákærður í Kanada fyrir þrjú brot er varða barnaníðsefni. Vísir greindi fyrst frá málinu í gærkvöldi. Jóhann, sem á íslenskan föður og skoska móður, er búsettur í borginni Abbotsford í Bresku-Kólumbíu og það var staðarmiðillinn Abbotsford News sem greindi frá málinu.

Málið gegn Jóhanni snýr að innflutningi og dreifingu barnaníðsefnis þar ytra  í júní 2022 og janúar 2023 sem og vörslu barnaníðsefnis í maí 2023. Í frétt staðarmiðilsins kemur fram að rannsókn málsins hafi hafist í mars 2023.  Er haft eftir lögreglustjóra borgarinnar að rannsakendur málsins hafi lagt sig alla fram við rannsókn málsins og meðal annars með hjálp leitarheimilda hafi böndin beinst að Jóhanni.

Málið var tekið fyrir í dómstól ytra þann 6. nóvember síðastliðinn en í umfjöllun staðarmiðilsins kemur fram að Jóhann hafi ekki mætt í réttarsal til að halda uppi vörnum.

Jóhann hefur starfað við kvikmyndagerð hérlendis, er giftur íslenskri konu og eiga þau einn barnungan son saman.