Svíar hyggjast gefa kúm þang að éta til þess að draga úr losun metangass úr þörmum þeirra. Aðferðin á að geta minnkað losun um allt að 90 prósentum.
Metangas er mjög slæm gróðurhúsalofttegund sem losnar meðal annars þegar jórturdýr leysa vind og ropa. Er hún um tuttugufalt virkari gróðurhúsalofttegund en koltvíoxíð. Fjölgun nautgripa á undanförnum árum og áratugum er því talin mikil umhverfisvá en hver nautgripur losar að jafnaði um 120 kíló af metangasi á ári.
Samkvæmt nýrri skýrslu sænska umhverfisráðuneytisins hefur þróun í leiðum til að minnka þessa losun verið ör á undanförnum árum. Einkum leiðir til að breyta fóðri skepnanna. Þetta kemur fram í umfjöllun breska blaðsins The Guardian.
Á meðal þess sem lagt er til er að kúm verði gefið fóður með rauðum þara, sem inniheldur efnið brómóform. Með þessu væri hægt að draga úr losun metangass um allt að 90 prósent en viðurkennt er þó að það þurfi frekari rannsókna við áður en hafist er handa.
Í skýrslunni er einnig lagt til að kúm verði gefið efni sem kallast 3-NOP (nituroxíprópanól). Þetta efni hefur verið notað sem sem fóður sums staðar í Svíþjóð og annars staðar frá því í febrúar í fyrra, þegar Evrópusambandið leyfði notkun þess.
3-NOP getur dregið úr metanlosun mjólkurkúa um 30 prósent og sláturgripa um 45 prósent.
Hugmyndin að gefa kúm þara að éta er ekki sænsk heldur áströlsk. En vísindamenn þar uppgötvuðu þetta þegar þeir voru að reyna að finna leiðir til þess að örverur í maga nautgripa mynduðu minna gas.
Þó að rannsóknirnar lofi mjög góðu fyrir umhverfið eru enn þá settir nokkrir varnaglar. Það er einkum vegna óvissu um langtíma áhrif á heilsu nautgripanna og þeirra sem neyta kjöts og mjólkur þeirra. Þá er þarafóðrið mun dýrara en venjulegt nautgripafóður er í dag.
Hefur verið hvatt til frekari rannsókna á þarafóðri en þegar er farið að tala um „loftslagskýr“ í þessu samhengi.
Í landbúnaði kemur langmest losun gróðurhúsalofttegunda frá nautgriparækt. Árið 2021 losaði sænskur landbúnaður því sem samsvarar 3,6 milljónum tonna af koltvísýringi í heildina. 2,9 milljónir af því mátti rekja til viðreksturs nautgripa.
„Við trúum því að þessi aðferð geti dregið úr metanlosun nautgripa í Svíþjóð,“ segir Emma Carlsen, loftslagsráðgjafi hjá sænsku náttúruverndarstofnuninni. „Við eigum ekki margar aðrar aðferðir sem geta haft jafn mikil áhrif og þessi án þess að skerða framleiðsluna. En þetta er nýtt og það á eftir að gera meiri rannsóknir áður en við getum myndað stefnu um þetta.“
