Ástandið á Gaza-ströndinni fer síversnandi enda stigmagnast árásir Ísraelhers á norðurhluta landssvæðisins og á almenningur fótum fjör að launa. Hvert langtímamarkmið er, fyrir utan að uppræta Hamassamtökin, veit engin enda hafa yfirvöld í Ísrael ekki gefið út neinar slíkar áætlanir eins og fjölmiðlamaðurinn Kristinn Hrafnsson bendir á.
Kristinn segir að vísbending kunni að liggja í minnisblaði frá opinberri ísraelskri stofnun, Ministry of Intelligence, sem lekið var til miðilsins Mekomit. Stofnunin er ekki sérlega áhrifamikil samkvæmt miðlinum en engu að síður er áhugavert að sjá svart á hvítu þær tillögur stofnunin leggur fram til annarra opinberra aðila, meðal annars leyniþjónustunnar og hersins í Ísrael.
Tillögurnar rýma nefnilega ágætlega við þá atburðarás sem nú er hafin á Gaza-ströndinni.
„Í þessu plaggi eru dregnar upp nokkrar sviðsmyndir en sú sem mælt er með felur í sér að flæma alla Palestínumenn frá Gaza (2,2-2,3 milljónir) og koma þeim fyrir á Sínaí skaganum í Egyptalandi. Plaggið er dagsett 13. október og felur í sér hugmyndir um nánari útfærslu og sér í lagi hvernig vinna skal þessari hugmynd fylgi,“ skrifar Kristinn.
Þar er lagt til í fyrstu að flæma alla íbúa Gaza frá norðurhlutanum til landamæra Egyptalands og skapa pressu á þarlend stjórnvöld að opna landamærin og taka við fólkinu. Síðan verður norðurhlutinn sprengdur linnulaust þar til farið verður inn með her og landssvæðið smátt og smátt tekið yfir.
„Þó að ekki sé hægt að fullyrða að þetta sé stefnan sem fylgt er í átt að „hinni endanlegu lausn“ er sannarlega verið að fylgja þeim skrefum sem þarna er mælt með. Áætlanir um þjóðernishreinsanir eru því til á blaði hjá opinberri stofnun í Ísrael,“ segir Kristinn.
