Greint var frá því í gærkvöldi að séra Agnes M. Sigurðardóttir, biskup Íslands, hafi verið vanhæf til að gegna embætti sínu eftir að skipunartími hennar rann út 1. júlí á síðasta ári. Séra Gunnar rak málið fyrir nefndinni en honum var vikið úr starfi sóknarprests Digranesprestakalls vegna kynferðislegrar áreitni. Ákvörðunin um að víkja honum var hins vegar ólögmæt þar sem Agnes hafði ekki umboð.
Séra Agnes hyggst áfrýja niðurstöðunni.
Auður Björg tjáir sig um málið við Morgunblaðið í dag og er býsna harðorð í garð kirkjunnar.
„Þetta er grafalvarlegt mál. Biskup er æðsti maður þjóðkirkjunnar og sr. Agnes hefur ekki haft umboð til starfans frá 1. júlí 2022. Það er ítrekað búið að benda biskupi og Biskupsstofu á það, en Agnes situr sem fastast og gefur ekkert fyrir þessar ábendingar eins og hún sé einráð,“ segir hún og bætir við að mál séra Gunnars sé sorgarsaga og dæmi um hvernig Þjóðkirkjunni hafi mistekist í mannauðsmálum sínum.
„Hún hefur brotið gróflega gegn honum og ég ætla bara að vona að í framhaldi af þessu muni Biskupsstofa bjóða umbjóðanda mínum sanngjarnar bætur og úrlausn sinna mála,“ segir Auður.
