Þórdís Kolbrún R. Gylfadóttir verður fjármálaráðherra og Bjarni Benediktsson verður utanríkisráðherra.
Þetta var tilkynnt á blaðamannafundi formanna ríkisstjórnarflokkanna sem hófst klukkan 11:00. Fundurinn fór fram í Eddu, húsi íslenskunnar.
Ríkisráðsfundur verður haldinn klukkan 14:00 á Bessastöðum og þar fara ráðherraskiptin formlega fram.
Formennirnir reifuðu ýmis verkefni ríkisstjórnarinnar 0g sögðu að um 60 prósentum þeirra væri lokið. Allir voru þeir einhuga um að klára kjörtímabilið þó að áherslur flokkanna væru ólíkar í ýmsum málum.
Katrín Jakobsdóttir forsætisráðherra sagðist bjartsýnari nú en fyrir nokkrum vikum að samstarfið geti gengið. Sagði hún ákvörðun Bjarna rétta að segja af sér sem fjármálaráðherra.
Bjarni sagðist þurfa að axla ábyrgð á að hafa komið á þessu stjórnarsamstarfi og það geri hann með því að sitja við ríkisstjórnarborðið.
Bjarni Benediktsson sagði af sér embætti fjármálaráðherra á þriðjudag. Ástæðan var nýbirt álit Umboðsmanns Alþingis þar sem kom fram að Bjarni hafi ekki verið hæfur til að samþykkja tillögu Bankasýslunnar um sölu á hlut úr Íslandsbanka vorið 2022. En faðir hans, Benedikt Sveinsson, var einn af kaupendum í bréfunum.
Ákvörðunin kom mörgum á óvart en Bjarni gaf ekkert upp um áform sín á þeim tíma. Girti heldur ekki fyrir neina möguleika í því samhengi.
Stíft hefur verið fundað innan ríkisstjórnarinnar síðan þá. Meðal annars funduðu stjórnarþingmenn á Þingvöllum í gær.
