„Þetta er stórhættulegt og ættu engin börn að eiga þannig vopn,“ segir kona í Innri-Njarðvík sem varð fyrir því að skotið var með loftbyssu á svefnherbergisglugga heimilis hennar fyrir einni til tveimur vikum síðan. Málið er til rannsóknar hjá lögreglu en grunur er um að börn hafi verið að verki. Konan birti færslu um málið í íbúahópi á Facebook:

„Það var skotið á svefnherbergisgluggann hjá mér um daginn með loftbyssu með stálkúlu. Lögreglan hefur málið á sínu borði en mig langar að biðja foreldra sem eiga börn sem eiga þannig byssur að ræða við þau. Þetta er stórhættulegt og ættu engin börn að eiga þannig vopn. Ef það er einhver sem veit eitthvað um þetta þá væri ég þakklát fyrir að fá ábendingar um hver var að verki. Það á ekki að vera mitt að borga fyrir þetta.“

Konan segir í samtali við DV að hún vilji ekki vega að börnum og þetta sé viðkæmt, en engu að síður hafi hún talið rétt að stíga fram með málið. Hún vill samt ekki vera dómhörð í garð þeirra sem voru að verki: „Strákar verða strákar, það er bara þannig, ég á tvo stráka sjálf. En þetta er samt ekki eitthvað sem maður vill ekki sjá gerast,“ segir hún.

Hún upplýsir að loftriffilskúlan hafi brotið ytra gler gluggans en ekki náð í gegnum innra glerið og skilið þar eftir sprungu sem auðsæileg er á mynd sem fylgir fréttinni. Kúlan hefur ekki fundist.

Sem fyrr segir rannsakar lögregla málið. Konan vill mjög gjarnan komast í samband við foreldra barna sem þarna geta hafa verið að verki og útkljá málið í friðsemd.