Lögregla birti færslu um þetta á Facebook-síðu sinni en um er að ræða nýtt form svokallaðra smishing-árása.
„Smishing er form vefveiða þar sem glæpamenn senda út svikul skilaboð í formi SMS skilaboða,“ segir lögregla en veiðar sem þessar hafa verið nokkuð algengar hér á landi. Oftast er tekið fram að viðkomandi eigi von á pakkasendingu en þurfi að fara inn á ákveðna slóð þar sem skrá þarf kortaupplýsingar og greiða ákveðið gjald til að fá pakkann afhentan. Kortaupplýsingarnar eru síðan notaðar til að ná háum fjárhæðum af kortinu.
„Nú hefur bæst við ný nálgun. Nú er fólk að fá skilaboð sem líkir eftir bankanum þeirra og þolendur eru beðnir um að fara á tengil og síðan staðfesta skráningu með rafrænum skilríkjum. Þetta er gert til að komast inn á heimabanka viðkomandi og í raun yfirtaka hann. Það er greinilegt að þessir glæpamenn hafa góða þekkingu á virkni heimabanka og hvernig hægt er að millifæra fé og jafnvel stofna ný greiðslukort og virkja þau stafrænt á símum glæpamannanna. Þegar glæpamenn hafa náð stjórn á heimabankanum þá geta þeir gert ansi mikinn usla og stolið umtalsverðum upphæðum og jafnvel stofnað til skulda.“
Lögregla kveðst hafa séð að fólk sem talar ekki íslensku að móðurmáli er viðkvæmara fyrir þessu formi á svindli.
„Verið er að gera varnir tryggari gegn þessu nýja svindli, en vandinn er að hluta til sá að brotaþolar eru sviknir til að staðfesta aðgerðir með rafrænni auðkenningu og hleypa þannig glæpamönnunum inn á heimabankann sinn eins og þau væru að fara inn sjálf. Því beinum við því til fólks að skoða gaumgæfilega öll skilaboð sem miða að bankaviðskiptum og greiðslum og temja sér tortryggni gagnvart þeim. Ekki treysta vörumerkjum fyrirtækja því þau er mjög auðvelt að falsa í svikaskilaboðum.“
