Það eru ekki bara stærstu lið Ítalíu sem hafa áhuga á því að kaupa Albert Guðmundsson sóknarmenn Genoa. Í hinum virta miðli Gazzetta, segir að lið frá Spáni hafi einnig áhuga.

Albert hefur verið frábær síðustu vikur með Genoa og hefur það ýtt undir áhuga stærri félaga á honum.

Albert kom til Genoa í janúar á síðasta ári og féll með liðinu í Seriu B. Liðið komst aftur upp í efstu deild og hefur Albert spilað vel.

Roma og Napoli hafa áhuga á að kaupa íslenska sóknarmanninn en nú virðast lið á Spáni einnig farin að sýna honum áhuga.

Albert er 26 ára gamall og lék áður í Hollandi. Líklegt er talið að hann fari frá Genoa í janúar þegar félagaskiptaglugginn opnar.

Napoli eru núverandi meistarar á Ítalíu en hjá Roma gæti hann leikið undir stjórn Jose Mourinho.

Albert hefur skorað þrjú mörk í síðustu tveimur leikjum og hefur sprungið út undir stjórn Alberto Gilardino.

Albert má ekki leika með íslenska landsliðinu þessa dagana þar sem að hann var kærður fyrir kynferðisbrot af konu hér á landi, málið er búið í rannsókn og er nú á borði ákærusviðs sem tekur ákvörðun um næstu skref.