Kolbrún Áslaugar Baldursdóttir, sálfræðingur og borgarfulltrúi Flokks fólksins, opnaði sig á dögunum um svokallaða svefnskelfingu (e. night terror) sem hún glímir við.
Kolbrún skrifaði færslu á Facebook sem vakti talsverða athygli, en kveikjan að skrifunum var þátturinn Betri svefn sem sýndur var í Sjónvarpinu síðastliðið fimmtudagskvöld.
„Ég veit ekki hvort þið sáuð þáttinn í sjónvarpinu í gærkvöldi en þar var m.a. fjallað um night terror eða svefnskelfingu eins og það er kallað. Ég glími við þennan vanda sem hefur ágerst með aldrinum,“ sagði Kolbrún sem ræddi síðan málið í Reykjavík síðdegis á Bylgjunni á föstudag.
Kolbrún lýsti svefnskelfingunni svona í færslunni:
„Svefnskelfingin eða martröðin gengur iðulega út á að einhver, mér stærri og meiri og afar óhugguleg manneskja hefur komist inn og nálgast mig til að drepa mig. Maður byrjar að berjast um með hljóðum og spörkum til að verjast en veit að baráttan er töpuð. Þetta er hryllileg reynsla, svo raunveruleg og aðstæður skýrar.“
Í viðtalinu í Reykjavík síðdegis sagði Kolbrún að svefnskelfingin hafi byrjað að gera vart við sig reglulega fyrir fjórum til fimm árum. Taldi hún í fyrstu að þetta væri álagstengt en hún hafi einnig upplifað þetta í sumarfríum og í friði og ró uppi í sumarbústað.
Kolbrún sagði að þemað væri alltaf það sama: „Það er þarna aðili stærri og sterkari en maður sjálfur sem hefur það markmið að drepa þig. Í rauninni er það alltaf þannig, hann er oftast karlmaður, stærri og sterkari, kominn inn til þín og þú veist að þú átt ekki möguleika. En af öllum lífs- og sálarkröftum berst maður fyrir lífi sínu.“
Kolbrún kvaðst oft vakna yfir látunum í sjálfri sér en hryllingurinn og hræðslan sé mikil. Martraðirnar eru mjög raunverulegar og öll smáatriði mjög skýr, allt frá andlitsdráttum árásarmannsins til klæðaburðar hans. Árásarmaðurinn sé sjaldnast sá sami og ekki heldur einhver sem hún kannast við eða hefur séð áður, til dæmis úr bíómyndum.
Þá sagðist Kolbrún liggja oft vakandi í einn til tvo klukkutíma á meðan hún nær sér niður. Hún kvaðst hafa rætt málið við lækni en hann hafi ekki kunnað nein ráð. Í þættinum var látið að því liggja að ástandið megi hugsanlega rekja til skorts á dópamíni í heilanum.
Kolbrún sagðist í viðtalinu ekki hafa tjáð sig opinberlega um þetta áður en hennar nánustu viti af þessu.
„Kannski eru fleiri eins og ég með þessa reynslu og ég held að það sé allt í lagi að tala um það,“ sagði hún og er langt því frá ein um að glíma við þetta ef marka má athugasemdir við færslu hennar.
