Á fyrstu 15 dögum ársins fóru loftmengunargildi í Reykjavík 40 sinnum yfir 200 stig en það hefur ekki gerst áður á þessari öld. Samkvæmt reglugerð Umhverfisstofnunar mega gildin ekki fara nema 18 sinnum yfir 200 stig á heilu ári. Það tók því ekki nema 15 daga að fara yfir þessi mörk.

Fréttablaðið skýrir frá þessu í dag. „Þetta er örugglega met á þessari öld. Mengunin hefur verið í meira en 40 klukkustundir yfir leyfilegum mörkum á fyrstu fimmtán dögum ársins,“ sagði Þorsteinn Jóhannsson, sérfræðingur í loftgæðum hjá Umhverfisstofnun.

Hann sagði að froststillurnar í ársbyrjun valda þessari miklu mengun í Reykjavík og nágrannabyggðum. Það vanti rok og rigningu.

Hann sagði það einnig spila inn í að óvíða í Evrópu séu jafn margir bílar á hvern íbúa og á höfuðborgarsvæðinu. Einnig séu dísilbílar, sem menga mest allra bíla, enn mjög algengir á götunum.

Ekkert eftirlit er haft með mengunarvarnabúnaði í bílum sem nota jarðefnaeldsneyti en sá búnaður er undanþeginn árlegri skylduskoðun og því er ekki vitað hversu mikið gagn er af þessum búnaði að sögn Þorsteins.

Hægt er að lesa nánar um málið í Fréttablaðinu í dag.