Lögregluyfirvöldum í Perú er ekki skemmt yfir fréttum af fundi tveggja „geimverulíka.“ Sakamálarannsókn er hafin á blaðamanninum Jaime Maussan og stjórnvöld vilja vita hvernig líkin komust út úr landinu.
Eins og DV hefur greint frá sýndi Maussan, sem er sjötugur áhugamaður um fljúgandi furðuhluti, mexíkóska þinginu líkin tvö í síðustu viku. Sagði hann þetta merkilegustu uppgötvun sögunnar en fullyrti þó ekki að þetta væru geimverur. Þetta væru að minnsta kosti verur sem hefðu lifað á jörð með manninum.
Að sögn Maussan fundust verurnar, sem hafa fengið nöfnin Clara og Mauricio, í Perú árið 2017. Þær eru litlar, gráar, með ílangt höfuð og þrjá fingur. Rannsóknir hafi sýnt að erfðaefni þeirra sé að þriðja hluta óþekkt.
Vísindamaður frá háskóla í Mexíkó segir hins vegar að líklega komi sýnin úr nokkrum mismunandi múmíum frá ólíkum tímum. Annar hefur sagt að geimverurnar séu eins og dúkkur sem hafi verið settar saman úr leifum manna og dýra auk ýmissa gerviefna.
Stjórnvöld í Perú líta svo á að meintar geimverur séu að öllum líkindum mörg hundruð ára gamlar líkamsleifar frumbyggja. Það er frá fimmtándu öld eða fyrr, áður en Spánverjar settust að og gerðu Perú að nýlendu.
Leslie Urteaga, menningarmálaráðherra Perú, tilkynnti að verið væri að rannsaka hvernig Maussan hefði komist yfir líkin og hvernig þau hafi verið flutt úr landi. Það var menningarmálaráðuneytið sem tilkynnti málið til lögreglunnar.
Maussan hefur ekki gefið það upp hvernig hann fékk verurnar en hann hefur brugðist við tíðindunum frá Perú og sagst vera saklaus af ásökununum. Hann hefur einnig sagt að hann muni greina frá öllu saman á hentugum tíma.
„Ég hef engar áhyggjur. Ég hef ekki gert neitt ólöglegt,“ sagði Maussan í viðtali við breska blaðið The Telegraph.
