Ekkert hefur enn spurst til Magnúsar Kristins Magnússonar en greint var frá því í gær að hann hefði horfið sporlaust á Dóminíska lýðveldinu fyrir tæpri viku síðan. Hann átti að koma heim í flugi frá karabísku eyjunni síðasta sunnudag en mætti ekki í flugið og síðan hefur ekkert til hans spurst.
Systir Magnúsar, Rannveig Karlsdóttir, auglýsti eftir bróður sínum í gær og í samtali við DV segir hún að fjölmargir, sem hafi tengsl við landið, hafi boðist til að aðstoða og spyrjast fyrir ytra. „Fyrir það erum við fjölskyldan mjög þakklát,“ segir Rannveig.
Að auki nýtur fjölskylda Magnúsar aðstoðar utanríkisráðuneytisins og alþjóðadeild lögreglunnar en það er þó hópur æskuvina Magnúsar sem hefur verið fjölskyldunni stoð og stytta. „Þeir hafa lagt nótt við dag upp á síðkastið við að hringja, skrifa, reyna að reikna út ferðir og fleira. Það hefur verið okkur ómetanleg aðstoð,“ segir Rannveig.
Sjá einnig: Íslendingur horfinn sporlaust í Dóminíska lýðveldinu og systir hans biður um hjálp
Rannveig segir að tvær vísbendingar hafi komið upp úr krafsinu undanfarin sólarhring sem verið sé að kanna nánar. Annars vegar hafi borist fregnir af því að farangur Magnúsar sé mögulega enn á flugvellinum í dóminísku höfuðborginni og þá hafi hugsanlega verið hreyfing á einum samfélagsmiðla hans þann 12. september síðastliðinn, tveimur dögum eftir áætlaða heimferð til Íslands.
„Þetta er þó enn með öllu óstaðfest,“ segir Rannveig.
Magnús er fæddur árið 1987, um það bil 1,85 sm á hæð, grann- og íþróttamannslega vaxinn. Hann er með gráblá augu, dökkhærður, mjög snöggklipptur og með dökka skeggrót. Þeir sem gætu haft upplýsingar um ferðir Magnúsar eða afdrif Magnúsar, geta haft samband við lögregluna á höfuðborgarsvæðinu í síma 444-1000 eða við Rannveigu í síma 660-4313.
