Þann 15. september næstkomandi verður aðalmeðferð við Héraðsdóm Vesturlands, í Borgarnesi, í máli sem héraðssaksóknari hefur höfðað á hendur konu á sextugsaldri fyrir líkamsárás á sextugan mann haustið 2020.

Árásin átti sér stað á heimili konunnar og er hún sökuð um að hafa veist að manninum með ítrekuðum hnefahöggum í andlit og líkama, stungið hann ítrekað í líkamann með skærum og einu sinni í andlitið. Þegar maðurinn flúði af heimillinu er konan sögð hafa elt hann og gert tilraun til að stinga hann utandyra með skærunum.

Maðurinn hlaut af þessu mörg sár víðsvegar um líkamann, auk mars.

Þess er krafist að konan verði dæmd til refsingar og greiðslu alls sakarkostnaðar. Hún telst hafa gerst brotleg við 2. málsgrein 218. greinar almennra hegningarlaga sem gæti varðað allt að 16 ára fangelsi.

Þess má geta að ákæran í málinu birtist í Lögbirtingablaðinu í maímánuði síðastliðnum þar sem ekki hafði tekist að birta konunni ákæruna.