Ónefndur starfsmaður hjá British Museum í London hefur verið rekinn vegna gruns um að hann hafi stolið fágætum munum af safninu og skemmt aðra þeirra. Metro greinir frá þessu.

Meðal munanna eru skartgripir, steinar og glermunir frá því á 15. öld fyrir krist og fram til 19 aldar eftir krist.

Að sögn talsmanna safnsins eru flestir hlutirnir smágerðir og voru geymdir í geymslu á safninu. Þeir höfðu ekki verið til sýnis lengi en voru notaðir við rannsóknir.

Hinn grunaði hefur verið leystur frá störfum og forsvarsmenn safnsins hafa hleypt af stað sjálfstæðri rannsókn á hinum meintu brotum, en brotin eru líka til rannsóknar hjá fjársvikadeild Lundúnalögreglunnar.

„Safnið biðst afsökunar á því sem hefur gerst en við höfum bundið enda á þetta og erum staðráðin í að koma þessum málum í lag,“ segir Hartwig Fisher, forstjóri British Museum, í yfirlýsingu. „Við höfum hert á öryggisreglum okkar og erum í samvinnu við utanaðkomandi sérfræðinga við að setja saman fullkomna skrá yfir hluti sem eru týndir, skemmdir eða stolnir. Þetta er forsenda þess að við getum endurheimt munina.“