Gleðigangan í gær var sannkölluð gleðisprengja og bæði þátttakendur og áhorfendur nutu stundarinnar til fullnustu í ótrúlegri veðurblíða. Gleði, samhygð og kærleikur voru á meðal þess sem einkenndi stemninguna í iðandi mannhafinu. En því miður var hátíðin ekki laus við hatur og fordóma. DV hefur m.a. verið í sambandi við fólk sem varð fyrir hatursfullri árás unglinga sem skutu á þau með gelbyssu. Um er að ræða leikfang sem skýtur hörðum kúlum. Við meðferð þess er mælt með að notast við öryggisgleraugu og bannað er að skjóta úr slíkum byssum á fólk og dýr.

Perla Rós Karlsdóttir greinir frá atvikinu í Facebook-hópi hinsegin fólks og skrifar meðal annars:

„Þrír unglingsdrengir voru að skjóta með spitball byssu a okkur og á vini okkar. Þeir gengu um og voru að skjóta á fólk. Einn af vinum okkar fékk kúlu í augað sem getur verið alvarlegt. Þeir voru allir á aldrinum 14-15 og einn þeirra gekk með tyrkneska fánann (land sem er þekkt fyrir að vera homophobic).“

Í umræðum undir færslunni er greint frá fleiri andstyggilegum atvikum. Hrækt hafi verið á göngufólk, púað á þau og blysum hent að þeim. Í samtali við DV segist Perla þekkja mörg dæmi þess að hinsegin vinir hennar og fleira hinsegin fólk hafi orðið fyrir ofbeldi vegna kynhneigðar sinnar:

„Flest okkar hafa lent í því að það er gelt á okkur og okkur hótað líkamlegu og andlegu ofbeldi bara fyrir að vera eins og við erum. Ísland er mjög progressive en margir krakkar, aðallega unlingsstrákar, hafa verið að verki. Aðallega vegna áhrifa frá frægu fólki með hættulegar ranghugmyndir á netinu, t.d. Andrew Tate.“

Atvikið hefur verið tilkynnt til Samtakanna 78 en þau bjóða upp á móttöku tilkynninga um hatursglæpi. Búast má við að málið verð tilkynnt til lögreglu eftir helgi.