Listaverki eftir listamanninn þjóðkunna Ladda var stolið úr fyrirtækinu Heilsuhofið sem stendur við Kaupvangsstræti á Akureyri. Samkvæmt heimasíðu fyrirtækisins býður það m.a. upp á margs konar líkamsmeðferðir sem hugsaðar eru til heilsueflingar eins og t.d. nudd og örnálameðferð.

Í færslu á Facebook-síðu fyrirtækisins kemur ekki fram nákvæmlega hvenær er talið að verkinu hafi verið stolið eða hvað verkið heitir en í færslunni segir:

„Sá leiðinlegi atburður átti sér stað að þessari mynd eftir Ladda var stolið frá okkur hérna í Heilsuhofinu. Ef einhver hefur tekið eftir einhverjum/einhverri að bera út málverk hjá Subway eða bakvið hjá Hárgreiðslustofunni Design þar sem bílastæðin eru megið endilega láta okkur eða Lögreglan á Norðurlandi eystra vita.“

Í færslunni er einnig tekið fram að ef þjófurinn skilar verkinu áður en það verður um seinan verði engir eftirmálar af hálfu fyrirtækisins.

„Ef þú sem tókst hana sérð þetta þá máttu endilega skila henni og engir eftirmálar verða. Þá myndi ég gera það áður en lögreglan verður búin að fara yfir allar myndavélar og sjá hver þú ert.“