Huw Edwards sjónvarpsmaður BBC hefur verið nafngreindur af eiginkonu sinni sem þjóðþekkti einstaklingur breska ríkismiðilsins sem greiddi háar fjárhæðir fyrir kynferðislegar myndir af ungmenni, allt frá því það var 17 ára. Eiginkona Edwards, Vicky Flind, sendi fyrr í dag út yfirlýsingu fyrir hönd eiginmanns síns, en Edwards sem er 61 árs gamall hefur starfað hjá BBC í tæpa fjóra áratugi, frá árinu 1984. Hann er einn af hæst launuðustu starfsmönnum BBC, árið 2022 mun hann hafa fengið 440 þúsund pund í laun, eða um 75 milljónir króna.
Á sunnudag birtist viðtal við móður ungmennisins í breska miðlinum The Sun, og í gær steig annað ungmenni fram með yfirlýsingar um ósæmilega hegðun Edwards. Segir Flind í yfirlýsingu sinni að síðustu dagar hafi verið henni og fjölskyldu hennar einstaklega erfiðir. Segir hún að Edwards glími við geðræn vandamál og hafi síðustu ár leitað sér aðstoðar vegna alvarlegs þunglyndis.
„Ég stíg fram með opinbera yfirlýsingu aðallega vegna áhyggna af andlegri velferð eiginmanns míns og til að vernda börnin okkar. Huw dvelur nú á sjúkrahúsi þar sem hann fær meðferð um ótiltekinn tíma,“ segir Flind, en hjónin eru búsett í London ásamt fimm börnum þeirra. Hún biður jafnframt um að fjölskyldan fái frið vegna málsins og segir hún atburði síðustu daga hafa gert illt verra. „Þegar hann verður nógu hraustur ætlar hann að bregðast við ásökunum sem hafa verið birtar.“ Segir hún að eiginmaður sinn hafi fyrst vitað af ásökunum á fimmtudag þegar The Sun samband við fjölmiðlaskrifstofu BBC vegna viðtalsins við móður ungmennisins.
Breska lögreglan greindi frá því fyrr í dag að mál Edwards yrði ekki rannsakað þar sem enginn glæpur hafi átt sér stað. BBC mun hins vegar rannsaka málið innanhúss.
