Finnska flugfélagið Finnair vildi að lögmaðurinn Ómar R. Valdimarsson, sem á og rekur Flugbætur.is, myndi greiða persónulega kostnað við málarekstur sem hann stóð fyrir í héraði og var tilhæfulaus að mati flugfélagsins.
Forsaga málsins er sú að þann 7. júlí síðastliðinn vísaði Héraðsdómur Reykjavíkur frá máli sem Ómar höfðaði fyrir hönd fimm skjólstæðinga sinna á hendur Finnair vegna rúmlega fjögurra klukkustunda seinkunnar á flugi Finnair frá Svíþjóð til Taílands 19. desember 2021.
Flugfarþegarnir fimm fólu Ómari að innheimta bætur vegna seinkunnarinnar og í dómsorði kemur fram að hann hafi sent fimm aðskilin bréf á Finnair dagana 19. og 28. janúar þar sem farið var fram á að hverjum og einum yrði greitt 600 evrur í bætur innan 15 daga. Ekkert svar barst við þessum bréfum og kvaðst Finnair ekki hafa móttekið þau fyrir dómi.
Þann 6. apríl stefndi Ómar svo Finnair hérlendis fyrir hönd skjólstæðinga sinna en fór nú fram á 87.800 króna bætur fyrir hvern einstakling en 600 evrurnar til vara.
Fyrir dómi var tekist á um hvort að rétt væri að höfða málið hér á landi. Finnair krafðist þess að málinu yrði vísað frá í ljósi þess að félagið er finnskur lögaðili en Ómar vildi meina að skjólstæðingar hans hafi verið staddir hérlendis þegar þeir fjárfestu í flugmiðunum í gegnum vefsíðu flugfélagsins og vísaði í ákvæði svokallaðs Montreal-samnings, um samræmingu tiltekna reglna varðandi loftflutning milli landa, sem hefur lagagildi hér á landi.
Í íslenskri þýðingu samningsins segir að höfða megi mál þar sem útibú flugfélags er starfrækt. Reyndi Ómar að færa rök fyrir því að um sé að ræða ranga þýðingu þar sem „place of business“ hafi verið þýtt sem „útibú“. Vildi hann meina að „place of business“ ætti við þann stað þar sem samningurinn komst á, sem svo sannarlega hafi verið á Íslandi og vísaði til þess að dómstólar í Ítalíu og Bandaríkjunum hafi túikað ákvæðið með þeim hætti.
Héraðsdómari féllst þó ekki á þessa röksemdafærslu og ákvað að visa málinu frá dómi. Þá akvað hann að fella niður málskostnað og hunsaði því kröfu Finnair um að Ómar yrði látinn bera þann kostnað persónulega. Vildi dómarinn meina að að röksemdir Ómars hafi ekki verið alveg úr lausi lofti gripnar þó ekki hafi verið tekið tillit til þeirra.
