Héraðssaksóknari hefur gefið út nýja ákæru í hryðjuverkamálinu, þar sem tveir ungir menn voru sakaðir um skipulagningu hryðjuverka. Fyrri ákæru var vísað frá dómi, bæði í héraðsdómi og Landsrétti.

Ákæran verður ekki birt sakborningunum fyrr en á mánudag en þá verður hún þingfest. DV ræddi við Svein Andra Sveinsson, lögmann annars sakborninganna, og segir hann stöðuna óbreytta eftir þessa nýju ákæru, sem hann hefur undir höndum en getur hvorki afhent né greint ítarlega frá efni hennar.

Sveinn segir héraðssaksóknara núna leitast við að sneiða framhjá frávísun og fá efnisdóm um málið.

„Hin nýja ákæra er talsvert ítarlegri en sú fyrri, en að mínu mati er staðan óbreytt, tilraunabrot ákærunnar er enn jafn óljóst og áður; hvað hafi staðið til að gera, hvar, hvenær, hvernig og gegn hverjum,“ segir Sveinn Andri Sveinsson.