Rannsókn lögreglu á andláti Sofiu Samite Kolesnikova, 28 ára gamallar konu, sem fannst látin í heimahúsi á Selfossi 29. apríl, beinist nú að hugsanlegu manndrápi. Er það í samræmi við bráðabirgðaniðurstöðu krufningar.
Tveir karlmenn á þrítugsaldri voru handteknir sama dag á vettvangi og síðar úrskurðaðir í gæsluvarðhald til 5. maí. Öðrum þeirra var sleppt í gær, en Héraðsdómur Suðurlands framlengdi nú fyrir stuttu gæsluvarðhald til 19. maí yfir hinum manninum.
Í tilkynningu frá lögreglunni á Suðurlandi kemur fram að rannsókn málsins beinist nú að hugsanlegu manndrápi til samræmis við bráðabirgðaniðurstöður krufningar. Rannsókn málsins sé á viðkvæmu stigi og meðal annars er beðið gagna erlendis frá.
Lögreglan fundaði með aðstandendum Sofiu í dag þar sem þau voru upplýst um stöðu rannsóknarinnar, en lögreglan telur sig vera með nokkuð skýra mynd af atburðarrásinni sem leiddi til andláts hennar.