Héraðsdómur Vesturlands hefur dæmt karlmann skilorðsbundið fangelsi fyrir brot á kynferðislegri friðhelgi konu. Alls hlaut hinn sakfelldi sextíu daga dóm en refsingin fellur niður ef hann heldur skilorð í tvö ár.

Maðurinn var ákærður fyrir að senda nektarmynd af konu á þriðja aðila í gegnum samskiptaforritið Snapchat auk þess að hóta konunni því að dreifa fleiri nektarmyndum af henni. Sú hótun hafi verið til þess fallin að valda henni ótta og kvíða.

Sjá einnig: Hörður snapchatperri dæmdur í þriggja ára fangelsi fyrir brot gegn börnum – Móðir þolanda vonar að hann fái hjálp

Maðurinn játaði skýlaust brot sín en þau geta varðað allt að fjögurra ára fangelsi.  Í ljósi játningar, viðurkenningar á bótaskyldu og að maðurinn væri með hreint sakarvottorð þótti dómara skilorðsbundni dómurinn við hæfi.

Konan gerði einkaréttakröf upp á 1 milljón króna í miskabætur frá hinum sakfellda en dómarinn ákvað að 300 þúsund krónur væru hæfilega bótaupphæð. Auk eigin málakostnaðar var manninum gert að greiða rúmlega 420 þúsund króna lögfræðikostnað brotaþola.

Hér má lesa dóminn í heild sinni