Karlmaður í Reykjanesbæ hefur verið kærður til lögreglu fyrir frelsissviptingu og líkamsárás á dreng á tólfta aldursári. Frá þessu greinir RÚV.

Drengurinn gerði, í félagi við aðra drengi, dyraat hjá manninum á sunnudagskvöldið. Segir í frétt RÚV að maðurinn, sem er á sjötugsaldri, sé í kjölfarið sakaður um að hafa setið fyrir drengjunum síðar um kvöldið, ráðist að þeim og dregið einn þeirra inn á heimili sitt þar sem hann læsti drenginn inni.

Hélt hann drengnum föstum í tæplega níu mínútur og neitaði að hleypa honum út. Hafi foreldri eins drengjanna þurft að brjóta rúðu á útidyrahurð mannsins til að komast þangað inn og frelsa drenginn.

Samkvæmt móður drengsins hlaut hann áverka við árásina, bæði líkamlega og andlega.

Hefur umræddur maður áður verið kærður fyrir sambærilegt brot, en árið 2008 var hann ákærður fyrir að ráðast á sautján ára pilt sem var að gera dyraat hjá honum.

Sama ár hafi hann verið ákærður fyrir að ráðast á og nema á brott fimmtán ára dreng í bíl sínum.