Héraðsdómur Suðurlands hefur dæmt Þorlák Fannar Albertsson til þess að greiða samfanga sínum á Litla-Hrauni 300 þúsund krónur í miskabætur fyrir líkamsárás. Árásin átti sér stað þann 18. desember 2020 í eldhúsi Litla-Hrauns. Í dómsorði kemur fram að Þorlákur Fannar hafi slegið samfanga sinn í höfuðið með trékefli þannig að hann féll í gólf og þar sem hann lá haldið árásinni áfram með því að slá hann ítrekað í höfuð og líkama. Þá hafi Þorlákur að lokum sparkað í höfuð þolandans. Afleiðingar voru þær að fórnarlambið hlaut mar og blæðingu undir húð aftan við hægra eyra og glóðarauga hægra megin. Þorlákur Fannar játaði skýlaust sök í málinu en mótmælti fjárhæð bótakröfunnar sem farið var fram á eða 2 milljónir króna.
Þorlákur Fannar á langan sakaferil að baki en hann hefur mátt sæta refsingu tólf sinnum árum. Hann afplánar nú sjö og hálfs árs fangelsi vegna tilraunar til manndráps, alvarlegrar líkamsárásar og frelsissviptingar í lok árs 2021.
Meðal annars réðst Þorlákur Fannar gegn leigusala sínum við Langholtsveg í Reykjavík, varaþingmanninum Herdísi Önnu Þorvaldsdóttur, frelsissvipti hana og veitti henni lífshættulega áverka með hnífi. Árásin átti sér stað í júní 2020 en Herdís Anna steig meðal annars fram nýlega í viðtali við RÚV og lýsti árásinni sem var hrottaleg í meira lagi og í raun með ólíkindum að hún hafi komist lífs afs.
Þá var Þorvaldur Fannar einnig dæmdur fyrir árás og frelsissviptingu gegn félaga sínum í íbúð í Bríetartúni. Þeir félagarnir höfðu verið úti að borða og lýsti brotaþoli því svo að Þorlákur hefði svo bundið sig, lamið með kúbeini og haldið honum föngnum í íbúðinni í rúman hálfan sólarhring.
Niðurstaða Héraðsdóms Suðurlands var sú að Þorlákur Fannar skyldi ekki fá lengri dóm vegna árásarinnar en að miskabæturnar yrðu, eins og áður segir, 300 þúsund krónur. Þá þarf hann að greiða verjanda sínum 448.763 krónur í málsvarnarlaun sem og 230 þúsund krónur í málskostnað brotaþola.
