Á kvöld- og næturvakt lögreglunnar á höfuðborgarsvæðinu bar það helst til tíðinda að tilkynnt var um byssuhvelli í Garðabæ. Lögreglan fór á vettvang og komst að því að um flugeldaskothríð var að ræða, ekki notkun skotvopna.

Í Kópavogi valt bíll. Tveir voru í bifreiðinni og slasaðist farþeginn en þó ekki alvarlega. Var hann fluttur á bráðamóttöku.

Ökumaður einn sinnti ekki stöðvunarmerkjum lögreglunnar og ók aftan á aðra bifreið þegar hann reyndi að koma sér hjá því að stöðva aksturinn. Hann er grunaður um ölvun við akstur og var hann handtekinn.

Í Miðborginni var tilkynnt um mann sem væri illa til fara en mjög kalt var í veðri. Maðurinn fékk húsaskjól hjá lögreglunni og gisti í fangageymslu í nótt.

Einn var handtekinn vegna líkamsárásarmáls á skemmtistað í Miðborginni og var hann vistaður í fangageymslu.

Í Vesturbænum var maður handtekinn eftir að hann hafði reynt að sparka upp hurð. Hann var vistaður í fangageymslu.

Í Háaleitis- og Bústaðahverfi var tilkynnt um innbrot í verslun. Þar var tölvu stolið.

Fjórir ökumenn voru handteknir grunaðir um að vera undir áhrifum áfengis og/eða fíkniefna.  Einn þeirra reyndist vera sviptur ökuréttindum.