Trú – Skýr markmið – Jákvætt viðhorf – Einbeiting á eigin getur/skýr hlutverk. Þetta eru þau fjögur atriði sem eru lykillinn að því að skila íslenska landsliðinu á verðlaunapall á HM í handbolta, að mati Loga Geirssonar, handboltasérfræðings og fyrrverandi verðlaunahafa með íslenska landsliðinu.

Logi fer yfir þetta í viðtali við Fréttablaðið í dag. Logi vann silfur á Ólypmíuleikunum sem leikmaður með íslenska landsliðinu, og brons á EM. Hann segir að á þeim tíma þegar landsliðið var sigursælast hafi það einbeitt sér að eigin getu og styrk en hugsað minna um andstæðinginn:

„Hvað við gætum gert vel og hugsuðum minna út í and­stæðinginn, í hverju þeir væru góðir. Við unnum í okkur sjálfum og hugsuðum miklu frekar hvað við værum góðir og hvað and­stæðingurinn þyrfti að gera til þess að vinna okkur. Við lærðum að vera stóra liðið, það hefur oft vantað í lands­lið Ís­lands.

Þegar svona sigur­vegarar fara úr liðinu líkt og gerðist með lands­liðið á sínum tíma þá þurfa bara nýir að koma inn, það kemur nýr kúltúr inn í liðið og þeir sem hafa náð að vinna, leik­menn eins og Aron Pálmars­son, þurfa að telja hinum trú um að við getum þetta. Við efldum liðs­heildina á sínum tíma, skil­greindum okkar hlut­verk, allir vissu sín hlut­verk.“

Logi er á því að við þurfum að hugsa stórt og þora setja okkur stór markmið:

„Fegurðin við mark­miða­setningu er þannig að um leið og þú hefur sett þér mark­mið sem þú ætlar að reyna að ná, þá ferðu að spyrja þig: Hvað þarf ég að gera til þess að ná þessum mark­miðum? Það er þá sem töfrarnir eiga sér stað.“

Logi segir ennfremur að jákvætt viðhorf sé mjög mikilvægt. Segir menn hafi breytt viðhorfi sínu í liðinu sem varð sigursælast í íslenskri handboltasögu og vann til verðlauna á Ólympíuleikunum og EM:

„Við breyttum því hvernig við töluðum í lands­liðinu, sögðum enga nei­kvæða hluti. Við töluðum ekki um að vera að eyða tíma saman á hótelinu í lands­liðs­verk­efnum, við töluðum um að verja tíma saman. Inni á vellinum kölluðum við aldrei „Strákar! Engar tvær mínútur,“ það var nei­kvætt, í stað þess sögðum við „Halda sér inn á“.“

Já­kvæða við­horfið hafi verið gegnum­gangandi í lands­liðs­verk­efnum, sama hvort um hafi verið að ræða að­stæður utan eða innan vallar.

„Þetta var í rútunni, þetta var á hótelinu, æfingum og í leikjunum. Óli Stef á heiðurinn af þessu, hann breytti þessu á alveg magnaðan hátt, maður upp­lifði stóra breytingu.““

Sjá nánar á vef Fréttablaðsins