Áhrifavaldurinn Kristján Einar Sigurbjörnsson var handtekinn nú fyrir stundu af sérsveitarmönnum á Húsavík. Að sögn sjónarvotta tók aðgerðin rúmlega 40 mínútur og var hluta Mararbrautar lokað á meðan handtökunni stóð.

Samkvæmt heimildum DV var Kristján Einar, sem er iðulega kallaður Kleini, grunaður um aðkomu að alvarlegri líkamsárás á Akureyri um áramótin.

Kristján Einar staðfesti í stuttu samtali við DV að hann hafi verið handtekinn en honum hafi svo verið sleppt stuttu síðar enda alsaklaus að eigin sögn.

„Aðgerðir lögreglu voru greinilega byggðar á einhverjum misskilningi og mér sleppt eftir stutt spjall enda ekkert sem ég hafði gert rangt,“ sagði hann.

Hann bætti því við að hann komi alveg af fjöllum varðandi að hann hafi verið grunaður um líkamsárás og segir að hann hafi verið grunaður um akstur undir áhrifum.

Kristján Einar hefur verið mikið í sviðsljósinu eftir að hann losnaði úr fangelsi í Malaga á Spáni í lok nóvember eftir tæplega átta mánaða vítisvist að hans sögn. Þar mátti hann dúsa eftir að hafa verið handtekinn í apríl fyrir slagsmál í næturlífi borgarinnar.