Landsréttur hefur snúið við þeirri ákvörðun Héraðsdóms að Arnarnesvegur ehf, eigandi fasteignar við Ránargrund 4 í Garðabæ, sé heimilt að bera Gourmet ehf, rekstrarfélag veitingastaðarins Sjálands sem starfræktur er í húsnæðinu, út vegna vangoldinnar leigu.

Í dómnum kemur fram að rekstraraðili staðarins hafi glímt við rekstraerfiðleika sökum heimsfaraldurs kórónuveirunnar. Ekki hafi verið hægt að nota veislusal húsnæðisins um langt skeið og vegna takmarkanna hafi rekstrartekjur staðarins lækkað um allt að 90% frá september 2020. Óskað hafi verið eftir helmingsafslætti af húsaleigunni fjóra síðustu mánuði ársins 2020 en á það var ekki fallist. Að endingu var komist að samkomulagi um greiðslu þessara mánaða og að endingu voru allir mánuðirnir greiddir nema desember 2020.

Þá kemur fram í dómnum að forsvarsmenn Arnarsnesvegar haldi því fram að leigugreiðslur allt árið 2021 hafi borist seint og illa og ganga hefði þurfti eftir þeim. Engin gögn voru þó lögð fram til stuðnings þeim yfirlýsingum.

Í byrjun árs 2022 harðnaði aftur í ári vegna nýrrar Covid-bylgju og voru vanefndir með greiðslu húsaleigunnar í janúar og febrúar 2022. Eigandi fasteignarinnar sendi greiðsluáskorun til rekstraraðilans þann 22. febrúar síðastliðinn þar sem þess var krafist að gerð yrði upp vangoldin húsaleiga fyrir desember 2020 og janúar og febrúar 2022, samtals um 9,3 milljónir króna. Ýmis samskipti áttu sér stað milli aðilinna og þann 8. mars greiddi rekstraraðili 3 milljónir króna inn á skuldina. Þann 23. mars kl.10.20 greiddi svo rekstraraðilinn upp vangoldnu leiguna en 10 mínútum síðar, kl.10.30, barst yfirlýsing um riftun leigusamningsins frá húseiganda.

Í dómsmálinu var tekist á um hvort að eigandi fasteignarinnar hefði átt rétt á að rifta leigusamningum. Héraðsdómur var á því að það hefði verið heimilt en Landsréttur var á öndverðum meiði.

Hér er hægt að kynna sér dóminn í heild sinni