Einn þeirra fjögurra sem handtekinn var í aðgerðum sérsveitarinnar á miðvikudag starfar sem lögfræðingur og rekur eigin stofu. Lögfræðingurinn, sem er á fimmtugsaldri, var í forsvari fyrir félag sem leigði iðnaðarbil við Bugðufljót í Mosfellsbæ og aðgerð sérsveitarinnar síðastliðinn miðvikudag beindist að. Um er að ræða einskonar samkomusal en þar hafði meðal annars bar verið innréttaður á efri hæð hússins. Þar fann lögreglan einnig skotvopn sem hald var lagt á. Lögfræðingurinn var handtekinn ásamt tveimur öðrum í Mosfellsbæ en fjórði maðurinn, Sindri Snær Birgisson, var handtekinn í aðgerð við Holtasmára í Kópavogi sem vakti mikinn óhug meðal sjónarvotta.
Lögfræðingnum var sleppt úr haldi lögreglunnar við annan mann að loknum yfirheyrslum en Sindri Snær var úrskurðaður í gæsluvarðhald í eina viku ásamt fjórða manninum sem fékk tveggja vikna gæsluvarðhaldsúrskurð.
Sindri Snær, sem fæddur er árið 1996, var handtekinn var í aðgerð við Holtasmára á miðvikudaginn síðastliðinn. Eins og greint var frá fyrr í dag var Sindri Snær handtekinn á heimili sínu í Rimahverfi í Grafarvogi fyrir rúmri viku síðan og úrskurðaður í vikulangt gæsluvarðhald. Hann var leystur úr haldi á þriðjudaginn en rúmum sólarhring síðar aftur handtekinn.
Á heimili hans var lagt hald á skotvopn þar á meðal breyttan rifil, þrívíddarprentara og íhluti í þrívíddaprentaðar byssur. Þá er ljóst að lögregla komst þar í gögn um meintar tengingar við hægri öfgahópa. Þar á meðal fannst stefnuyfirlýsing norska fjöldamorðingjans Anders Breivik í tölvu Sindra Snæs samkvæmt heimildum DV.
Þrátt fyrir það var ekki talin þörf á lengra gæsluvarðhaldi og því var Sindra Snæ sleppt úr haldi. Allt bendir til þess að lögregla hafi fylgst með og hlerað samskipti Sindra Snæs því ástæða þess að hann var handtekinn að nýju sólarhring síðar voru rafræn samskipti hans við annan mann þar sem orðið „fjöldamorð“ kom fyrir, líkt og greint var frá í frétt RÚV, sem minnst hafi verið á Alþingi, árshátíð lögreglumanna og einnig einstaka þingmenn – herma heimildir.
Ljóst er að málið á sér varla hliðstæðu hér á landi. Aðgerðir lögreglu, sem staðið hafa yfir í rúma viku, hafa verið afar umfangsmiklar og hafa vakið athygli út fyrir landsteinanna. Þannig hafa sumir af stærstu fjölmiðlum heims greint frá hryðjuverkaógninni á Íslandi og hvernig lögreglan hafi brugðist við henni.
