Konurnar þrjár sem skipuðu efstu sæti á lista Flokks fólksins á Akureyri í vor, og hafa lýst ofbeldi, kynferðislegri áreitni og einelti af hálfu forystumanna flokksins, boðuðu til blaðamannafundar í dag.
Konurnar, þær Málfríður Þórðardóttir, Tinna Guðmundsdóttir og Hannesína Scheving Virgild Chester, boðuðu til blaðamannafundar með innan við klukkustundar fyrirvara í dag en sýnt var frá fundinum í beinni útsendingu á Vísir.is
Þar sögðu þær sig knúnar til að stíga fram eftir mikla fjölmiðlaumfjöllun og ávirðingar í þeirra garð.
Eftir að konurnar stigu fram var stutt í að efstu karlar á lista flokksins stigu einnig fram. Þar er um að ræða þá Brynjólf Ingvarsson, geðlækni og oddvita flokksins á Akureyri, og Jón Hjaltason sem skipar þriðja sæti listans.
Karlarnir vildu afsökunarbeiðni
Þeir skrifuðu grein á Akureyri.net með yfirskriftinni „Konurnar eru að segja ósatt og varaformaður lætur hafa sig að fífli“ en það var upphaflega varaformaður Flokks fólksins, Guðmundur Ingi Kristinsson, sem sagði frá áreitni og ofbeldi í garð kvenna í flokknum fyrir norðan.
Í greininni sögðu þeir Brynjólfur og Jón að yfirlýsing kvennanna væri „fjarri öllu sanni sem hugsast getur“ og krefjast þeir afsökunarbeiðni frá þeim. Þá neita þeir því að hafa kallað þær vitlausar eða geðveikar.
Á blaðamannafundinum í dag töluðu konurnar um samskipti sín við Brynjólf og Jón en einnig um samskipti við Hjörleif Hallgríms Herbertsson sem skipar 22. sæti á listanum, og þau samskipti hafi ekki verið góð.
Hjörleifur sagðist í viðtali við RUV á dögunum vera guðfaðir lista Flokks fólksins á Akureyri og að hann frábæði sér allar ásakanir um kynferðislega áreitni. Þar spurði fréttamaður Hjörleif hvort konurnar hafi túlkað tilraunir hans til að útkljá málin sem einhvers konar áreitni. Hjörleifur svarar: „Ég skal ekki segja um það því ég tel að þetta sé ekki normalt hjá þeim sko. Þær eru ekki heilbrigðar, hvernig þær láta. Í gamla daga klappaði maður kannski stelpu á rassinn án þess að maður væri sakaður um kynferðisofbeldi, það hefði aldrei skeð svoleiðis með mig gagnvart þeim, ég hefði aldrei snert þær einu sinni en þetta væru breyttir tímar og þetta væri bara svona.“
Sagðist leggja hendur á konur í rúminu
Tinna segir að Hjörleifur hafi sagt við sig að hann hafi aldrei lagt hendur á konur nema í rúminu og hafi hann hvatt hana til að koma sem oftast í heimsókn.
Hannesína segir að hann hafi hringt mjög oft í sig, hafi sýnt henni óþægilega framkomu sem hafi valdið henni vanlíðan.
Þegar hún var að safna undirskriftum fyrir framboðið í vor hafi hún til að mynda ekki þorað að vera ein með Hjörleifi. Þannig treysti hún sér ekki til að skila honum undirskriftunum persónulega heldur hafi hún sett þær inn um bréfalúguna hjá honum og hlaupið í burtu.
Þá sögðu þær að það hafi aðeins verið Hjörleifur sem sýndi af sér kynferðislega áreitni, en ekki Brynjólfur og Jón. Þeir tveir hafi hins vegar verið meðvitaðir um hegðun hans í garð kvennanna en ekkert aðhafst. Allir þrír hafi þeir síðan áreitt þær og beitt þær andlegu ofbeldi.
Til að mynda hafi Brynjólfur og Jón ekki boðað þær á fundi með fulltrúum minnihlutans í bæjarfélaginu þegar bæjarfulltrúar skiptu nefndarsetu á milli sín, og ákváðu þeir þá einhliða hvort og í hvaða nefndum þær skyldu sitja næstu fjögur árin.
Missti stjórn á sér
Málfríður hafi þá sent tölvupóst og spurst út í þessa hunsun. Brynjólfur hafi þá sent tölvupóst með yfirskriftinni „Hjálp!“ en sá póstur hafi augljóslega ekki átt að fara á þær því þar talaði hann illa um þær og sagðist vera orðinn fastur í ormagryfju með þeim.
Þá sagði hún að áreiti af hálfu Brynjólfs með tölvupóstum hafi verið mikið og frá því í vor hafi hún fengið yfir 250 tölvupósta frá honum. Staðan hafi verið orðin sú að hún var orðin kvíðin fyrir því að opna tölvupóstinn sinn.
Þá sagðist Málfríður hafa yfirgefið síðasta fund fulltrúanna grátandi eftir að Jón hafi misst stjórn á skapi sínu og veist að húsgögnum.
Konurnar segjast þakklátar Ingu Sæland formanni og Guðmundi Inga varaformanni. Þær segjast gjarnan vilja starfa áfram með flokknum að bæjarmálum á Akureyri en framtíðin eigi eftir að leiða í ljós hvernig það fer.
