Hannes Steindórsson, bæjarfulltrúi í Kópavogi og formaður Félags fasteignasala, birti yfirlýsingu á Facebook-síðu sinni rétt í þessu. Í yfirlýsingunni opnar Hannes sig um baráttu sína við alkóhólisma og hvernig að ein mistök urðu til þess að gisti fangageymslu í Svíþjóð fyrir nokkru.

Hann segist harma mistökin og að áfengi eigi ekki fara inn fyrir sínar varir. Hann hafi ákveðið að gera hreint fyrir sínum dyrum eftir að hafa setið undir hótunum fjölmiðla að eigin sögn.

Færslu Hannesar má lesa í heild sinni hér.

Kæru vinir, það eru þung skref að skrifa þessa færslu, þið sem þekkið mig vitið að ég er bindindismaður og alkahólisti, ég hef skammast mín lengi fyrir það og ekkert verið að auglýsa það.
Ég hef verið allsgáður meira og minna síðan 2005 og alveg síðan 2009, í tæp 11 ár hef ég verið frjáls og laus við Bakkus. Í lífinu gerir maður mörg mistök og tekst á við allskonar verkefni sem manni eru falin, sum þægileg og falleg, önnur erfið og illviðráðanleg, þannig er jú lífið. Ég gerði stór mistök fyrir nokkru þar sem ég drakk sterkt áfengi, ég er með ofnæmi fyrir áfengi og mér er fullljóst að það á ekki að fara inn fyrir mínar varir. Ástæða þessa skrifa er í fyrsta lagi að koma hreint fram og sætta mig við þá stöðu að ég er alkahólisti, önnur ástæða er að fjölmiðlar hafa hringt í mig með vel kryddaðar sögur og undir rós hótað að birta lygasögur og kjaftasögur. Rétt skal vera rétt, undirritaður sat einn inná veitingastað í svíþjóð að svara tölvupóstum og símtölum, á næsta borði setjast tveir herramenn og eru að drekka. Á einhvern óskiljanlegan hátt þigg ég boð um að drekka með þeim, það endar ekki betur en svo að ég lendi í áflogum við þessa menn og við erum beðnir um að yfirgefa veitingastaðinn, stuttu seinna kemur lögreglan og fylgir okkur út af staðnum, Fjörtíu og fjögurra ára þriggja barna faðir gisti fangageymslu þá nótt. Daginn eftir geng ég út eftir að hafa greitt sekt, ein til ríkisins og einnig til þessara ágætu manna. Það var ekki hátt á mér risið, skömmin ólýsanleg og líðanin eftir því. Ég fer beint í faðm fjölskyldu minnar og í raun trúi ekki að ég hafi lagt þetta á þau. Ég flýg til Íslands daginn eftir og tek ábyrgð á gjörðum mínum með viðeigandi hætti. Eftir það fór ég beint á þann stað þar sem ég á heima, 12 spora samtök sem gera mig að betri manni, betri föður, betri syni.
Ég ákvað að segja frá þessu sjálfur þar sem ég sætti mig ekki við hótanir fjölmiðla.
Ég er kominn á réttan stað aftur og ætla að vera þar.